Genesis 9

Dirava ena gwau-hamata

1Dirava ese Noa mai natuna ida e hanamodia, eto, Besemui ba havaradia, bae vara rohoroho, tanobada bae hahonua. 2Tanobada boromadia iboudiai bona atai manudia iboudiai bona tano ai e raumu ḡaudia iboudiai bona davara gwarumedia iboudiai ese garimui bae gari; umui ese danu ba biagudia. 3E maurimu bona e loamu ḡaudia iboudiai na amui vamu; aniani avadia vada na henimui heḡereḡerena, ini danu na henimuimu, amui; 4ḡau tamona, hidio mai rarana basio ania, badina be rara na mauri badina. 5Umui raramui danu, emui mauri badina, davana baina abia: boroma enai baina abia eiava taunimanima enai baina abia; taunimanima enai tadikakana rarana davana baina abia. 6Taunimanina baine alaia mase tauna na taunimanima ese bae alaia mase; badina be Dirava ese taunimanima e karadia, ia ida-idana. 7Benaini, besemui ba havaraida, bae hutuma; tanobada ai bae vara rohoroho, hae hutuma bada.

 8Bena Dirava ese Noa mai natuna ida ma e hereva henidia, eto, 9Lau o ina, egu taravatu umui bona murimui bae vara garamui na henimuimu; 10mauri ḡaudia iboudiai danu umui ida nonoho na henidiamu, manu bona bokomakau bona tanobada boromadia iboudiai na henidiamu, lagatoi amo e raka lasi ḡaudia iboudiai. 11Egu taravatu lau ese baina badinaia umui emui ai: mauri ḡaudia na utu-utu ta ese basine aladia lou; utu-utu badana ta basine utua dae lou, tanobada basine hadikaia lou. 12Dirava ma eto, Egu taravatu na henimuimu, lauegu bona umui emui danu, mauri ḡaudia umui ida nonoho iboudiai edia danu, ela bona uru iboudiai, toana binai: 13egu kevau dagadaga ai na atoamu, taravatu toana ai bainela, lauegu bona tanobada ena. 14Taunabunai, lau ese dagadaga tanobada baina hadagahulaia negana ai na kevau be dagadaga ai ba itaia. 15Bena egu taravatu baina laloa, lauegu, umui emui bona mauri ḡaudia iboudiai edia danu: utu-utu badana ta basina ha-utua dae lou, mauri ḡaudia basina habuadia tari lou. 16Kevau na dagadaga ai baine hedinarai, bena baina itaia negana ai, hari mia-hanaihanai taravatuna, lau Dirava bona tanobada ena mauri ḡaudia iboudiai padadai, baina laloa tao. 17Dirava ese Noa ma e hamaoroa, eto, Lauegu ai bona mauri ḡaudia iboudiai ediai na atuamu taravatuna toana binai.

Noa ena Mauri dokona

18Noa natuna mamaruanedia, lagatoi amo e raka lasi taudia, ladadia na Sem bona Ham bona Iafet. Ham na Kanaan tamana. 19Noa natuna tatoiosi bunu; tanobada besedia iboudiai na idia tatoiosi ese e havaradia.

 20Unu dinadia ai Noa eha biru, vine imeana e hadoa. 21Bena vine ranuna e inua, e kekero; bena ena kalaga ai e hekure, asi dabuana. 22Bena Ham, Kanaan tamana, ese tamana na ḡaḡaena mo e itaia; bena e raka lasi, tadikakana raruosi e hamaorodia. 23Bena Sem bona Iafet ese dabua ta e abia, paḡadia ai e idia roro, e rakalaia muri, asie roha kerehai, ela tamadia e tarua, ḡaḡaena mo bae itaia na garina. 24Noa ena kekero amo e noga, bena e diba natuna ihararuana ede vada e karaia toma. Bena eto,

 25Kanaan ihabaina!
Tadikakana edia hesiai taudia edia hesiai tauna ai bainela.
 26Ma eto,
Iehova, Sem ena Dirava, aita imodaia;
Kanaan ese ia isiaina baine lao heni.
 27Dirava ese Iafet baine hanamoa,
Sem ena dabua kalagadia ai baine noho,
Kanaan ese ia isiaina baine lao heni.
 28Utu-utu badana murinai Noa na laḡani sinahu-toi imahui e mauri nohova. 29Ena mauri laḡanidia iboudiai na sinahu-taurahani-ta imahui: bena e mase.
Copyright information for MEU